Seksa
Mii lea albma ilmmis seksa? Makkár seksa háliidan mun? Makkár seksa háliida son geainna mun háliidan anášit? Liikongo garra seksii vai leago soames lohkan ahte galggašin liikot dasa? Dahkaluttango liikot juoidá vai neaktá dego mun ipmirdan seksamáilmmi? Leago duođas heivvolaš duššo joatkit vaikko it leat gulaskuddan iežáin liikojitgo dasa?
Seksa lea sihke gelddolaš, suohtas ja vuogas. Muhto sáhttá maid leat váttis ja unohas. Seksa galgá álo dovdot buorren, sihke ovdal, anašettiin ja maŋŋil.
Min luhtte sáhtát chattet namaheamet buot du jurdagiid birra seksa olis, mii guldalit ja doarjut.
Mii lea seksa?
Seksa lea iešguđetlágán iešguđetge olbmui, muhto čilgejuvvo dávjá leat áššit maid dagat iežainat dahje iežáiguin seksuálalaš vugiin. Oallugiin mis leat jurdagat seksa birra, fantasiijat ja dovddut juogamasa dahje soapmásii.
Leat ollu vuogit movt sáhttá seksa návddašit, ovdamearkka dihte onaneret (seksa iežainis), njávkkadeapmi, guoskkaheapmi dahje chattet soapmásiin himuid loktejeaddji vugiin. Gávdnojit ollu iešguđetlágán vuogit návddašit seksa ja seamma ládje lea buohkain iežaset vuohki movt návddašit seksa ja geaiguin.
Dus lea vuoigatvuohta iskat du seksualitehta ja himuidat. Dagat nu go háliidat go dus lea seksa iežainat. Go háliidat anašit soapmásiin iežáin de mearridehpet dii geat lehpet šiehttan anašit, mii orro vuohkkaseamos ja buoremus didjiide.
Anašit
Muhtin ovdamearkkat maid sáhttá leat buorre jurddašit jus háliidat ságastit soapmásiin seksa birra: Leago dá olmmoš geasa luohtát? Jáhkátgo dát olmmoš guldala ja veahkeha du daiguin jurdagiiguin mat dus leat? Ságastallan galgá orrot buorre du mielas.
Seksa iežainat
Oallugat mis onanerejit árra beallešaddi agis ja dasto eanet dahje unnit olles eallenagi, muhtimat dahket dan dávjá, earát hárve dahje eai goassege. Ii leat heittot iige várálaš onaneret ja mearridat ieš áiggutgo dahkat dan vai it. It dieđusge galgga onaneret soapmása čalmmiid ovddas gii ii hálit oaidnit dan. Dat gohčoduvvo seksuálalaš ráfehuhttin ja lea lobiheapme.
Onaneren ii váikkut gorudii movtge negatiivvalaččat, ii leat vejolaš gorudis oaidnit onanere go olmmoš, leaš dál bárdni, nieida, transolmmoš dahje ii-bineara.
Seksa iežáiguin
Seksa galgá álo dovdot buorren, sihke ovdal, seksedettiin ja maŋŋil. Go iežáiguin atná seksa de galgá álo gulahallat vugiin mii árvvusatná nuppiid ja galgá álo geahččalit ipmirdit maid nuppit háliidit dahje eai hálit.
Vai vissásit diehtá maid muhtin háliida dahje ii hálit, de ferte guldalit nuppi olbmo máŋgga ládje aktanaga: mii dadjo, gorutgiela ja eará signálaid.
Muhtomin sáhttá boastut ipmirdit nuppi, daningo eai buohkat dulko signálaid seamma ládje. Jus šaddat eahpesihkar, de sáhttá leat buorre albma ládje dárkkistit. Dá leat muhtin jearaldagat maid sáhttá atnit: Leago vuogas vai galgego rievdadit maidege? Mannágo bures duinna? Liikotgo dása? Vai háliidatgo juoidá eará dahkat? Maid don liikot? Maid don háliidat dahkat? Dáid jearaldagaid sáhtát jearrat ovdal seksa, seksedettiin ja maŋŋil seksa.
Lea váttis leat son guhte dadjá ii hearkkes dilálašvuođas. Dávjá vuhtto áigá jo go muhtin olmmoš ii hálit, de fertet geassádit ja diktit olbmo vuosihit maid son háliida. Jus it daga dan, de ii leat miehtan sajis.
Lea álki dovdat ahte lea bággu anašit ja ahte anašeapmi galgá leat vissis ládje. Okta ovdamearka lea diet dábálaš porra mii vuosiha bártni ja nieidda, mas buot lea bártni návddašeami ja orgásmma birra. Go geahčat dakkár porra de lea álki jurddašit ahte nie han seksa galgá leat. Muhto dat ii doala deaivása! Seksa lea go ovttas guorahallabehtet mii orro somá ja vuogas buot oassálasttiide.
Dat mii lea vuogas ja somá sáhttá maiddái rievdat. Duššo go muhtin háliida cummástallat ja guoskkahit du ii mearkkaš ahte galgá nuoladit álás ja anašit, muhto muhtomin sáhttá nu. Guldal iežat, orrogo buorre dovdu čoavjjistat? Orrotgo buohkat háliideame dán?
Sáhttá orrot váttis, muhto seksa gáibida hárjehallama. Ii oktage leat ekspearta das mii orro vuogas dutnje dahje iežáide, dat lea juoga mii ovdána, rievdá ja guorahallo áiggi badjel duinna iežainat ja/dahje iežáiguin ovttas.