Oktavuođat ja ráhkisvuohta
Oktavuođat leat dego čanasteamit dahje searvevuohta iešguđet olbmuid gaskkas. Oktavuohta soapmásiin ii leat seamma go leat ovttas soapmásiin, buot oktavuođat leat sierralágánat. Ovdamearkka dihte gávdnojit ustitoktavuođat, bearašoktavuođat ja ráhkisvuođaoktavuođat. Oktavuođat sáhttet dahkat ahte veadjá buoragit ja oktavuođat mat dahkat ahte veadjá hejot.
Leatgo beroštišgoahtán soames olbmos, muhto it dieđe movt galggat oktavuođa váldit? Leago váttis dilli ruovttus bearrašis? Leatgo diggon muhtin ustibiin ja lohkan juoidá maid gáđat? Leago soames guođđán du dahje háliidatgo ieš heaitalit? Balahatgo dávjá? Vai háliidatgo duššo ságastit veaháš oktavuođaidat birra? Oktavuođat leat stuora oassi min eallimis ja okta dábáleamos fáttáin min chattas. Mii geat chattet duinna leat hárjánan ságastit oktavuođaid, bearraša, ustitvuođaid ja ráhkisvuođa birra. Boađe chattet namaheamet, mii doarjut du.
Ráhkásnuvvan
Ráhkásnuvvat sáhttá leat nu hávski! Ráhkisvuohta sáhttá dagahit ahte dovdat vaikko maid gorudis. Čagalduhttima, liekkusvuođa, ráfi ja ilu. Soaittát duššo jurddašit olbmo birra, de šaddá váttis eará bargat. Muhto sáhtát maiddái dovdat ahte leat balus ja ahte dus lea váivi. Erenoamážit jus it dieđe dovdágo son, geasa leat ráhkásnuvvan, seamma go don. Go leat lahka soapmása geasa leat ráhkásnuvvan, de sáhtát leat hui balus ja sáhttá orrot hui somá seammás. Sáhttá goasii šaddat váttisin jus it ságas soapmásiin.
Geasa ráhkásnuvat?
Lea váttis diehtit manin mii ráhkásnuvvat dihto olbmui dahje olbmuide. Soaitá leat su jietna, hádja, movt son lea ja man birra ságasta. Lea dábálaš ieš hirpmahuvvat das geasa dahje geaidda ráhkásnuvvá. Soaittát jurddašit ahte dieđát juste makkár olbmuide liikot, ja de ráhkásnuvat áibbas iežálágán olbmui. Soaittát jurddašit ahte galggašit ráhkásnuvvat soapmásii gii gullá dihto sohkabeallái, muhto de fáhkka ráhkásnuvat áibbas iežái. Lea dábálaš dovdat ahte veaháš jorbbodat iežat dovdduin. Lea veadjemeahttun stivret geasa ráhkásnuvat – muhto don leat áidna gii beasat mearridit geasa oaččut ráhkásnuvvat. Ii oktage iežá go don mearrit geasa sáhtát ráhkásnuvvat. Chatte áinnas minguin ráhkisvuođa birra!
Riidu
Buohkain leat iežaset oaivilat, jurdagat ja dovddut, ja danin sáhttet oktavuođain muhtomin šaddat boasttuipmárdusat ja riiddut. Hárve lea duššo ovttas riekta dahje boastut ja dat lea ortnegis, nu guhká go ii oktage vahágahtto vugiin movt nubbi láhtte. Boasttuipmárdusat ja riiddut sáhttet leat váddásat, erenoamážit oktavuođain olbmuiguin geain beroštat. Sáhttá leat váttis ipmirdit movt earát dovdet ja soabadit earáiguin. Erenoamážit jus dus lea váivi, jus leat suhttan dahje balus. Ságastit soapmásiin earáin sáhttá dahkat álkibun ipmirdit movt earát dovdet ja seammás gávnnahit movt don ieš doaimmat.
Oktonasvuohta
Jus dovddat iežat oktonassan, de it leat lahkage áidna, ja go dan fuomáša, de sáhttá dat dahkat ahte dovdu veaháš geahppu. Buorre goansta go dovddat oktonasvuođa láve leat ságastit soapmásiin dan birra. Dan váste lea min chatta ja min lusa leat álo buresboahtin ságastit soapmásiin gii guldala ja doarju du. Soaittát dovdat ahte ii oktage liiko dutnje? Dahje ahte du ustibat leat olgguštan du? Beroškeahttá maid jurddašat leat mii dás guldaleame du, ja don leat áibbas namaheapme.
Balaheapmi
Du balaheapmi ii leat du guoimmi sivva. Dat lea dovdu mii boahtá dus alddát ja dávjá lea vuolggahuvvon das movt du eará lagas oktavuođat leat leamašan. Leago eallimistat leamaš muhtin dehálaš olmmoš gii lea beahttán du? Balahit lea dávjá lossat. Oallugat geat balahit háliidit mearridit guoibmáseaset badjel – maid son dahká, geaiguin lea fárrolaga dahje čálaša, makkár biktasat sus leat. Mearridit guoimmis badjel ii unnit balaheami, dat lea baicca vuorrádussan sutnje geainna leat ovttas. Danin lea dehálaš bivdit veahki ja oahppat movt birget balahemiin. Olmmoš sáhttá maiddái nagodit heaitit balaheamis.
Jus dát orrot oahpes áššit mat gusket dutnje, de lea buorre ságastit soapmásiin gii guldala ja doarju. Sáhtát álo ságastit minguin. Mii leat dás jus don ieš balahat dahje jus leat ovttas olbmuin gii balaha. Ságastit soapmásiin sáhttá geahpidit ášši, sihke dutnje ja earáide. Mii leat dás du váste – sihke chattes ja min ságastallanvuostáiváldimis!
Mii lea heivvolaš veagas?
Ovdamearkka dihte ii leat ovttasge riekti gohčodit du fasttes namahusaiguin, guoskkahit du goruda seksuálalaš vugiin, bávččagahttit du, lásset du juosat iige bissehit du skuvlla vázzimis. Dat lea du fuolaheddjiid ovddasvástádus fuolahit ahte dus lea buorre dilli, biktasat, báiki gos orut, ahte oaččut doarvái biepmu ja divššu go leat skibas. Dus lea maiddái vuoigatvuohta priváhtaeallimii. Jus jurddašalat meannuditgo duinna rievttes ládje, de sáhtát ságastit minguin dan birra. Mii doarjut du ja veahkehit du reflekteret. Chatte minguin namaheamet!