Miehtan
Buohkat sáhttet liikot iešguđetlágán seksii ja jus buohkat mihtet de lea ortnegis dahkat nugo háliidehpet. Movt dieđát maid soames iežá háliida? Jearrat iešguđet ládje ja lohkat gorutgiela sus dahje sis geaiguin dus lea seksa lea dehálaš vai lea vissis ahte liikobehtet seamma áššiide. Jearrat sáhttá orrot váttis ja veaháš heahpat álggus, muhto jurddaš dan vuohkin hárjehallat ja šaddat vissis ahte it rasttit eará olbmo rájiid. Rasttildit eará olbmo ráji lea lobiheapme, lága rihkkun. Sáhttá jurddašit ahte ulbmil lea jearrat ja guldalit oaččutgo juo, ja maiddái eará mearkkaid mat muitalit ahte son geainna anašat návddaša juste nugo don. Seamma dehálaš lea dohkkehit jus ii hálit. Ii leat goassege okej vuorjat ja viggat humahit nuppi dassái dadjá juo!
Movt iskat háliidago son, geainna háliidat anášit, geahččalit seamma maid don? Ráva mis lea ale dušše jeara háliidago olmmoš dahkat maid don háliidat. Jeara maid olmmoš liiko, mii su mielas lea vuogas dahje maid háliida geahččalit.
Maid mieđihanláhka dadjá?
Juo-sátni muhtin seksuálalaš dahkui ii mearkkaš ahte dat guoská eará daguide. Lea dehálaš juohke háve jearrat dahje juoga ládje gávnnahit háliidago nubbi ain leat mielde. Láhka dadjá ahte olbmos lea álo vuoigatvuohta rievdadit oaivila ja geassádit. Dan galgá dohkkehit son gii háliida seksa, muđui dahká vearredagu.
Vuorjat dahje áitit anašeapmái soapmása gii ii hálit, dat ii leat goassege miehtan. Ale goassege anaš soapmásiin gii lea hui jaska ja passiiva, orro ballame, geas lea bávččas, gii lea nohkkan dahje lea hui gárremin. Dat lea lobiheame.
Jus háliidat eanet lohkat miehtama birra ja movt lágat doibmet, de sáhtát dahkat dan siiddus frivilligtsex.se. Dat lea luohtehahtti siidu maid Brottsoffermyndigheten lea ráhkadan. https://frivilligtsex.se/om-lagen/
Lea maiddái dehálaš muitit ahte olbmot geat leat 15 jagi dahje boarráseappot eai oaččo anášit olbmuin gii lea nuorat go 15 jagi. Beroškeahttá jus son gii lea vuollel 15 jagi háliida anášit. Goitge lea lobiheapme boarráseappo olbmui anášit dainna olbmuin. Dás sáhtát lohkat eanet lága birra mii lea ráhkaduvvon suodjalussan mánáide ja nuoraide: https://www.frivilligtsex.se/du-under-15-ar/
Miehtan ja porra
Anašettiin soapmásiin lea gulahallan dehálaš vai ipmirda maid nubbi háliida dahkat. Go ipmirdit maid nubbi háliida dahkat de šaddá seksa suohttaseappo ja vuohkkaseappo. Oallugat gehččet porra vai ožžot gova movt seksa dáhpáhuvvá. Porrain deaivvadettiin sáhttá leat buorre jurddašit ahte dat ii vuosit mii seksa lea. Porra ii oahpat movt oaččut čielgasa návddašitgo sii geaiguin dus lea seksa seamma ollu go don ja dovdetgo iežaset oadjebassan.
Porra hutká njuolggadusaid das masa galggašeimmet searvat dahje maid háliidit dahkat, vaikko it soaittege háliidit. Lea dehálaš álo jearrat ja leat vissis ahte sii geaiguin don anašat duođas háliidit dahkat dan maid don háliidat dahkat. Porras lea hui dábálaš ahte nieida dadjá ii, muhto bárdni ii das beroš, duššo joatká. Porra sáhttá dájuhit min jáhkkit ahte miehtan ii mearkkaš maidege, muhto dan dat gal dahká. Seksa miehtama haga ii leat okej, dat lea lobiheapme!